لا تخاف انت عم تحلم

الاحلام المتكررة شي مرافقني من زمان كتير. أول حلم متكرر بتذكره هو اني عم قدم امتحانات البكالوريا بالرغم من اني خلصتها وضل الحلم مرافقني تقريبا عشر سنين وانا عم احلم انو لساتني طالب بكالوريا. هل شي سببه اني ما كنت رضيان عن علاماتي بالبكالوريا وكنت حابب عيد السنة, بس القدر شاء اني فوت عل جامعة على فرع ماكنت رايده بالبداية ولاحتى بالنهاية.

الحلم التاني أو بالأحرى مسلسل الأحلام التاني هو رجعتي للبلد. هاد المسلسل اله أجزاء ماكانت تخلص. الملخص تبعه هو اني بدون سبب بلاقي حالي بسوريا وببلش دور على طريق للهرب (مرة 2) لحتى ارجع للبلد يلي استقبلني. وهون في عدة مطبات وصعوبات منها انو كيف بدي اطلع من البلد بدون موافقة الجهة العاملة (كوني كنت موظف حكومي) وكيف بدي اوصل لهون وانا اقامتي ممكن تنتهي ومن وين بدي جيب مصاري للسفر و و و و

الحلم التالت كمان مسلسل ماكان يخلص ولكن تواتره اخف من الحلم التاني وهو لقائي مع بنتي, يمكن هي اول مرة بذكر فيها بنتي بموقعي هذا. انفصالي عنها وكونها بقيت بالبلد هاد ترك شرخ كبير بروحي. الحلم هو المكان يلي بلتقي فيه, المكان الوحيد يلي بتعاتبني فيه, المكان الوحيد يلي بعبرلها عن حبي الها.

المسلسل الخاص بالحلم الرابع هو عبارة عن حلقات متفرقة مو بالضرورة مرتبطة ببعضها وغالبا الها علاقة بشي صار معي بنهار اليوم نفسه