خطبتلك ياها

صيف ٢٠١٠ (على فكرة ضليت ربع ساعة عم دور بالوراق يلي عندي لحتى أتذكر هل تاريخ التعيس....)

ماما :"خطبتلك شادية" (مع ابتسامة كلها فخر)...

هون انا اجتني صدمة وما عرفت شو بدي قول، كل يلي بتذكره انو اول ما طلعت من عندهم قلتلها لامي بالحارة انو ما بدي وكيف انتي هيك بتقرري, هون قالتلي سكوت لا تحكي قدام مرت اخوك (مرت اخي الكبير يلي كانت معنا)....

هلق انا وعم اكتب هل كلمات تذكرت لما امي خبرتني انا وصغير انو لما قالت لا لما اجى ابي يخطبها, عمها ضربها كف وقلها خرسي....انا كمان بهل يوم اكلت كف بس من نوع اخر.

يلي بتذكره بخصوص مفاجأة الخطبة انو امي قالتلي انو لازم اتزوج واعمل عيلة, لان اخواتي كلهم صار عندهم عيلة وانو بس هي تموت راح اصفى لحالي ومن هل حكي....وكمان على قولتها انو ام خفيف (يلي صارت حماتي لاحقا) وزوجها كتير لمحلولها انهم بدهم يزوجو بنتهم وانو مابدهم شي وانو البيت يلي اشتروه راح يسكنو بنتهم فيه والخ من هل كلام غير المباشر يلي كانو عم يقولو فيه : اطلب شادية وقوي قلبك.....