لئيم ومقت

يمكن سمعتها فوق ال ١٠٠٠ مرة من امي واخواتي، اني انا لئيم ومقت وما بحب الفرح, واحيانا بعصب وبيطلع مني تصرفات متل المصروع. كانت كتير تشبهني بابي يلي بتكره وخلتني اكرهه بمرحلة ما بحياتي واكره حالي معو.

كان لازم استنى لعمر ال ٣٩ (عمري لما ساويت هاد الموقع ب ٢٠٢٤) لحتى اكتشف اني مريض وانه تقلب المزاج الدوري يلي عندي هو السبب يلي بخليني حزين بكتير من الاوقات وفرحان بأوقات اقل.

بصراحة هل اكتشاف خلاني سعيد لاني واخيرا عرفت شو معي وانو فيني اتعالج بس بنفس الوقت كنت حزين كتير انو مالقيت الدعم الكافي من اهلي من لما كنت صغير.

اليوم ماعندي اي مشكلة اني قول بصوت عالي اني مريض وبعاني من اضطراب المزاج الدوري, بس يمكن مالازم قول لاي شخص وخاصة بالشغل لحتى مايتم استخدامه ضدي بيوم من الايام.

معلش راح من عمري ٣٩ سنة معاناة وضياع, يمكن لسا قدامي قدهم لحتى عيش منيح (جرعة تفاؤل)