استروا ما شفتو مننا

انتحار؟ دا كلام؟؟؟

أي جربت انتحر، وعلى فكرة هلق انا وعم اكتب انتبهت اني حاولت مرتين انتحر بحياتي، محاولتين اثنتين ولكن هناك الاف الأفكار الانتحارية. أول مرة يمكن كان عمري ١٤ او ١٥ سنة، وبظن بسبب امي وأخي مفقور (هيك حبيت سميه هون)، ما عم اظلمهم، بس هدول ال٢ يلي الهم النصيب الكبير بمشاكلي النفسية. وقتها شربت ادوية وماصرلي شي، واكلت بعدها عقوبة، حتى امي قالت لزوجها : "اذا ابنك بحاول ينتحر شو بتعمل فيه"، بروح هو بقلها "بشخطو من الوريد للوريد" ههههه وهو المطلوب....العمى عل تخلف, هون باوربا بقدمو مساعدة للشخص يلي بحاول ينتحر وهنيك بدهم بكفروه وبيقتلوه لانو حاول ينتحر .....

المرة التانية كانت ببداية زواجي، لاني كنت عاجز اعطي شادية الحب يلي بدها ياه، او يمكن لانها هي انسانة حاقدة بطبعها وعندها غيرة قاتلة من البنات يلي تزوجو قبلها وهنن مالهم دارسين ولا بنات عيلة على قولتها...لان كننا دايما نتناقر وماكنت اقبل انها تتلفظ بكلمات عنصرية على نسوان اخواتي او عالبنات التانيات بشكل عام، ولما وصلت معي لمرحلة ماعاد اقدر اسمعها، كرت صحن فنجان القهوة وجرحت معصمي ٣ مرات ، لهلق موجودة اثار الجروح، بس ماصرلي شي، الدم توقف بعد فترة،،،،،وهي بعدين عملت متلي بس انا منعتها....يمكن لانها حست بتأنيب الضمير....هلق انا وعم اكتب هل كلمات، شعرت بسعادة كبيرة اني اتخلصت منها، واني راح عيش حياتي بعيد عنها وعن تفكيرها وعنصريتها وانغلاقها الثقافي و و و...شكرا اوربا لانك عيشتيني من جديد.

وحابب ضيف كمان مرة تالتة، ماكانت محاولة انتحار وانما تخطيط وتفكير جدي, يمكن بحكي عنها بعدين لما اتطرق لموضوع هروبي الأخير من سوريا